4-7 июньышто Удмуртийысе Ижевск олаште финн-угровед-влакын всероссийский 6-шо шанче конференцийышт эртаралтын («Финно-угорский мир в полиэтническом пространстве России: культурное наследие и новые вызовы»). Тышке Российын 20 регионжо да вес элла гыч (Эстоний, Финляндий, Венгрий, Австрий, Велокобританий, Германий, Словакий, Франций, Украин) учёный, шанче пашаеҥ, профессиональный да ешартыш шинчымашым пуышо учрежденийлаште туныктышо-шамыч, тӱвыра да мер организацийла гыч еҥ-влак, кугыжаныш виктемын представительже-влак толыныт: чылажге 300 наре специалист. Индешын – Марий Эл гыч. Тӱҥ шотышто В.М.Васильев лӱмеш йылмым, литературым да историйым шымлыше марий институтын пашаеҥже-влак.
Участник-шамыч 8 секцийыште пашам ыштеныт. Финн-угор йылме-влак историй да йылме наукын тӱрлӧ ужашлаже (грамматике, фонетике, морфологий да моло) нерген ойленыт; финн-угор сылнымут, тӱвыра, йӱла-влак дене кылдалтше йодыш-шамычым рашемденыт; национальный йылме корпусым ямдылыме шотышто каҥашеныт. Тылеч посна финн-угор калык-влак йылмыла дене кылдалтше ятыр темым тарватеныт. Конференцийыште пленарный заседаний, «йыргешке ӱстел-влак» эртаралтыныт. Тыгак уна-влак удмурт калыкын тӱвыраже, йӱлаже-влак дене палыме лийыныт, Ижевск олаште да ола воктенысе «Лудорвай» тоштерыш экскурсий дене коштыныт.
Тыгай конференций 5 ийлан ик гана эртаралтеш. Тудо финн-угровед-влакын калык-влак кокласе конгрессышт вашеш лиеш. Ты конгресс вес ийын Австрийысе Вена олаште лийшаш. А Российысе черетан финн-угор конференций 2024 ийыште Марий Элыштына лиеш.
Организатор-влакын ойлымышт почеш, конференцийыш ушнаш кумылан-влак кажне ийын ешаралтыт. Поснак самырык ӱдыр-рвезе-влакын финн-угор йылмылан шӱман улмышт куандара. Вес элыште илыше-влакат финн-угор йылмылам тунемыт, шымлат.
– Тыгай конференций финн-угор калык-влакым ик еш семын ушен шога. Кажне шке проблемыжым ойлен, шонымашыжым почын пуэн кертеш. Тыште огыл гын, кушто тыге чыланат эше вашлийын кертына? Ме ваш-ваш умылена, икте-весе деч тунем шогена, уым пален налына. Тиде чылажат ончыкыжым йылмынам тӱзаташ, калыкнам йӧраташ эшеат кумылаҥда. Удмуртий мемнам да молымат пеш порын вашлие. Вич ий гыч меат чылаштым вучена, – каласыш шанче институтын пашаеҥже Э.Пекшеева.