Йошкар-Олан рӱдыштыжӧ верланыше ик мотор пӧртыштӧ эрдене визымше пачаште тул чӱкталте. Озавате помыжалте да, лишыл еҥже-влакым кынелташ огыл манын, шыпак кухньыш ошкыльо. Чайым шындыш, вара шкенжым тӧрлаш тӱҥале. Ынде пелаш ден изи ӱдырым кынелташ жап.
Тиде озавате – «МЭТР» телерадиокомпанийыште 12 ий наре журналисткылан да вӱдышылан пашам ыштыше Наталья Ямаева (Курочкина). А пелашыже – Республикысе курчак театрын художественный вуйлатышыже, Марий Эл Республикысе сымыктышын сулло деятельже Алексей Ямаев. Воктенышт – ныл ияш Аня ӱдырышт.
Рошто годым мыят нунын ешыште уна лийым. Мотор, йытыра кухньышто (озаватын арулыкшо шижалтеш) Наташа дене еш илыш нерген кутыралтен шинчышна.
«Ме официально 2011 ий 21 июльышто мужыраҥынна. А пырля илаш тӱҥалынна 2009 ийыште. Кок ий гыч веле закон почеш ушненна. Пырля илымылан 10 ият лиеш», — ойлаш тӱҥале Наташа. — Мемнан икымше шинчаончалтыш гычак йӧратымаш лийын огыл. Мый Алексей Ямаев лӱман режиссёр улмым паленам, эсогыл тудым телевиденийыш войзашат миенам. Лёшат пален тыгай журналист, вӱдышӧ улмым. Но илыш корнына посна каен. Мый тудлан вӱдышӧ семын тӱҥалтыште йӧршеш келшен омыл улмаш. Тидым Леша шкежак вара мылам каласен. Мом шылташ: мыланемат тудо иканаште келшен огыл: кужу ӱпан ыле тунам, вигак шинчаш перныше гай чучын огыл. А 2009 ийыште Алексей Шкетан лӱмеш театрыште режиссёрлан да СМИ дене вашкылым ыштыше пашаеҥ семын тырша ыле. Икана мемнан телеканалыш толын да ойла: «Айста Шкетан театр нерген сюжет, оҥай передаче, вашлиймаш-влакым ыштена». Тыге пырля пашам ышташ тӱҥална. А икана «Шинчаваш» передачышкем еҥ пеш писын кӱлеш ыле. Мом ышташ? Мый Алеша деке йыҥгыртышым да полшаш йодым. «Айда мемнан театрын тӱҥ художникше Сергей Таныгин нерген передачым войзена» — манеш тудо. Тыге мылам неле ситуаций гыч лекташ полшыш. Вара паша келшымашке кусныш. Икте-весым ӱдыр-каче семын ончална». Мо оҥайже: келшаш тӱҥалмеке, нуно икте-весыштым кужу жап лӱм да ачалӱм дене ойленыт: Наталья Васильевна ден Алексей Анатольевич.
Наташа – ялыште шочын-кушшо (Марий турек районысо Аимке ял гыч) марий ӱдыр. Алексей Ямаев, руш манмыла, городской. Шочынак Йошкар-Олаште ила. Оласе-влак мыланна эре «крутойракла» чучыт. Нунын дене шотым муаш куштылго огыл чай. Адакшым А.Ямаевын аваже – Галина Иванова-Ямаева – палыме актрисе, РСФСР-ын сулло артисткыже. Леша шкежат – режиссёр, брутальный еҥ. «Кузе тудын дене илаш тӱҥалам, аважлан келшем мо манын шоналтен отыл?» — йодым Наташа деч.
«Ала? Тӱҥалтыште ала изиш шоненамат… Но Алеша пеш порын, шыман кутырен. А аваж нерген эре тыге ойла ыле: «Авам вет ялысе. Тудо вич ыр гай проста». Сандене келшаш, вашлияш тӱҥалмеке, чыла тыгай шонымаш йомо. Мылам туддене мутланаш, шкем кучаш куштылго ыле», — воштылале Наташа.
Адакшым Галина Николаевна Юмо деч эргыжлан ушан-шотан, сай пелашым вашлияш йодын. Ялысе ӱдыр лиеш гын, тетла сай манын шонен. Марий ӱдыр – шыма, пашам йӧратыше, ава лийшыжым жаплыше. Вес могырым, Алеша тудо жаплан 30 ийым эрталтыше лийын, кеч-могай ават эргыж воктен ӱдырамашым ужнеже, уныкам куштынеже. «Чын, тудо шешкым марий ӱдырак лийже манын шонен. Адакшым мемнан бовойна — Юмылан ӱшаныше, садлан шешкыжат тынеш пурышо лийже манын шонен. Мый лач тыгай толын лектынам», — шыргыжалеш Наталья. Алеша Наташам эн ондак аважлан огыл, а коважлан, Татьяна Васильевналан, ончыктен. Тудыжлан марий ӱдыр пеш келшен. А ончыкылык пелашыжым аваж дене У ийым вашлийме годым палымым ыштен. Келшаш тӱҥалмеке, Наташа ден Леша шке ача-аваштым (Лешан тачылан аваже гына уло) пырля чумырен, У ийым вашлийыныт. Тыге лийшаш тулар-тулаче-влакым вашла палымым ыштеныт.
Умбакыже 18 январьыште лекше номерыште лудса.