Волжский район Сотнур селан тале кидмастарже – В.Огурцов. Вячеслав пу дене пӱчкедыме тӱрлӧ мотор арвер-влакым ышта.
Кудывечышкыже пурымеке, шинчалан эн ондак моторын сӧрастарыме пӧртӧнчыл койо. Тошкалтыш дене кӱзаш йӧнан лийже манын, суртоза кидлан эҥертышым пӱчкеден келыштарен. Пӧртыштӧ мебель утларакшым шке кид дене ыштыме. Ӱстембал, угловой диван, прихожий – чылажымат чонлан келшышым ышта. Эсогыл пырдыжыште кечыше шагат шкешотан, тыгайже Огурцовмытын гына уло, шонем.
«Пу дене пӱчкедаш йоча пагытыштак тӱҥалынам. Школыштына «Умелые руки» кружок лийын. Лач туштак мый тиде пашалан тунемынам. Школ деч вара мӧҥгылан кӱлшӧ тӱрлӧ арвер-влакым пӱчкедаш тӱҥалынам. Тунам вет кевытлаште налаш окса чӱдӧ лийын. Варажым пошкудо-влак заказым пуаш тӱҥальыч. Кызытат кӧ мом йодеш – ышташак тыршем», – каласкалаш тӱҥале Вячеслав.
Кылыкыште тыгай уста кидмастар-влакым шӧртньӧ кидан маныт. Вячеславын кидше, чынжымак, шӧртньӧ. Тудо мебельым гына огыл, окналан наличникымат пӱчкеда. Пытартыш жапыште кидмастар мотор юмылук-влакым ышташ кумылаҥын.
«Юмылукым ышташ республикна гыч гына огыл, вес кундемла гычат йодын возат. Волгоград, Моско, Тверь олалаш ыштен колтенам. Южгунам Йошкар-Ола гыч толыт да мо пеш шулдын ужаледа маныт. Мыланна тидыжат сита. Ик юмылукым ышташ кум кече кая. Ик кече заготовкым ыштем, вес кече пӱчкедем, вара чиялтем. Кугуракшым ныл-вич кече ыштем. Чылажланат кумыл кӱлеш. Южгунам тыгай жап лиеш, кунам нимом кучымо ок шу. Кид ноя, вуй ярна. Ик-кок кече гыч адакат пижат. Ыштыде шуко жап чыташ ок лий», — манеш суртоза.
В.Огурцов Сотнур эмлымверыште столярлан тырша. Йӧратыме кидпашам яра жапыште гына ышта. Мемнан мийымына годым тудо лач кечывал канышлан мӧҥгыжӧ толын ыле да столяркыштыже тошкыштеш ыле.
Огурцовмытын пӧртышт тӱжвачат, кӧргӧ гычат моткоч чатка. Коеш, тыште илыше-влак еш пыжашыштым аралат, тушко уло чоныштым пыштат. Чыла пашам суртоза пелашыж дене пырля каҥашен ышта. Ирина Александровна кидмастарын кажне пашажым акла, кунамже иктаж ситыдымашымат ончыкта. Нуно ваш-ваш йӧратен да пагален илат. А тидыже икымше ончалмаштак коеш. Икшыве-влакымат нуно йӧратен куштат. Оля ӱдырышт 11 классыште тунемеш. Тӱрлӧ предмет дене олимпиадылаш коштеш. Ӱмаште республикысе олимпиадыште ИКН предмет дене икымше верым нале. Оля сӱретлаш мастар. Пӧлемысе пырдыжыште тудын икмыняр радынаже кеча. Йоча сӱретлен манын ӱшанаш неле, чылт кӱын шушо художник! Дима эргышт кудымшо классыште тунемеш. Тудо ачажын икымше полышкалышыже.
Огурцовмыт моткоч пашаче еш. Кумылышт нунын поро, тыматле. Тек умбакыжат нуно тыгак ваш-ваш йӧратен да пагален илат.