23-24 июньышто Чебоксарыште кидмастар-влакын «Русь мастеровая» Российысе декоративно-прикладной сымыктыш конкурсышт эртаралтын. Тыште Элнан тӱрлӧ регионжо гыч 87 участник таҥасен. Нунын кокла гыч иктыже – Марий Эл гыч тале кидмастар Виталий Кудрявцев. Тудо «Художественная обработка растительных материалов» номинацийыште эн тале кидмастар лӱмым сулен налын.
– Икымше кечын конкурс Мариинский Посадыште лийын. Мыланна таҥасымаш деч ончыч заданийым пуэныт. Темыже – пайрем. Улшо материал дене 8 шагат жапыште тиде темым почын пуыман ыле. 30 градус шокшо, калык онча, комиссийысе еҥ-влак тергат, а ме кидпашам ыштен шинчена. Мый пуш (ладья) форман корзиҥгам, финн теркем, марий калык йӱлам ончыкташ манын, подкогыльо совлам пидынам. Кокымшо кечын Чебоксарыште лийынна, ярмиҥгам да мастер-класс-влакым эртаренна.
Кидмастар-влаклан конкурс деч ончыч мӧҥгысӧ паша пуалтын: театр темылан келшыше арверым ышташ. Виталий Николаевич уа воштыр да кумыж дене дене тенийсе Театр идалыкын эмблемыжым пидын, тудым илышыште кучылташ сай йӧным шонен муын да шке пашаж дене палдарыше почеламутым возен. Икманаш, кидмастарлан сеҥыше лӱмым сулен налашыже ятырак тыршаш логалын.
Виталий Николаевичым сеҥымашыж дене уло кумылын саламлена. Ончыкыжымат сай паша лектышым да чыла сайым тыланена.