Ӱдыр-влакым куандара

Шошым поснак чот мотор лийме, тӱжвал сыныште ала-мом вашталтыме, ӱпым моторын пӱчмӧ шуэш. Икманаш, модный лияш кумыл лектеш. Южгунам моторлык салоныш толмо годым могай причёскым але стрижкым ышташ от пале. Стилист деч каҥашым йодеш. Специалист пашажым сайын пала да тудым чаплын шукта гын, ӱдыр але рвезе салон гыч куаныше кая. Шернур посёлкышто илыше самырык парикмахер Вера Губина – шке пашажым палыше профессионал. Районысо марлан кайышаш ӱдыр чылан манме гаяк сӱан причёскым тудлан ыштыкта.

В.Губина ойла: «Йоча годым парикмахер лияш шонен омыл. Авам тиде пашалан кумылан эре лийын. Родо-тукымна, пошкудына-влак ӱпым тӱредыкташ туддеке коштыныт. Новосибирскыште кокам дене унала лиймем годым авам документем Йошкар-Оласе технологический колледжыш наҥгаен. 2003 ийыште тушто тунемаш тӱҥалынам. А 2005 ийыште дипломым налынам. Студент годым парикмахер мастарлык шотышто конкурслаште участвоватленам. Мутлан, 2004 ийыште «Шошо. Самырык пагыт. Моторлык» республикысе конкурсышто вием тергенам. Дипломемат уло.  Но тунамат парикмахер пашалан чонем йӱлен огыл ала-молан. Лач колледжым тунем пытарымеке да Йошкар-Оласе ик парикмахерскийыш пашаш пурымеке веле  шке профессием йӧратен шынденам, шке верыштем улмем умыленам. Кызыт шочмо Шернур посёлкыштем илем да ынде 14 ий шканем пашам ыштем».  

Вера пашажлан эн кугу аклан клиентын шыргыжалмыжым да куанжым шотла. «Сай парикмахер-стилист-влак еҥ-влакын кумылыштым нӧлтат. Ӱдыр, ӱдырамаш-влак причёско, стрижке дене образыштым вашталтынешт. Ме тидым ышташ полшена. Сӱан причёскылан поснак кугу тӱткышым ойырыман. Вет марлан кайышашлык ӱдырын кажне ӱп пырчыже верыштыже моторын кийышаш, — манеш тудо. – Мӧҥгыштӧ мончаште тӱрлӧ маскым ышташ темлем. Ӱп йылгыже манын, самырык почкалтыш вӱд дене тудым шӱалтыман. Лопшудо вож дене  ямдылыме лем ӱп вожым пеҥгыдемда».

Вера кугу коллективыште пашам ышташ йӧрата. Кажне еҥ деч молан-гынат тунемаш, паша опыт дене вашла палдараш лиеш манын ойла. Тудо мастарлыкшым эреак нӧлташ тырша. Тӱрлӧ курсышто, конкурсышто участвоватла. 2017 ийыште Йошкар-Олаште эртаралтше «Модный образ» парикмахер искусство да эстетике  дене межрегиональный чемпионатыште мастарлыкшым ончыктен.

В.Губинан еш альбомжо гыч налме фото-влак.