Домра да кӱсле дене шоктышо мурызо

Тиде ӱдырын йӱкшӧ коклан Марий Эл радион эфирыштыже йоҥга, тудо мурым мура, а  мурызо семын сценышке пеш шуэн лектеш. Таче ме «Марий Эл» кугыжаныш ансамбльын оркестрыштыже домристкылан пашам ыштыше Ольга Богачёва дене палыме лийына.

У Торъял районысо Кӱшыл Макмат ялын шочшыжо изинек мураш йӧратен. Йочасадыште, школышто туддеч посна ик концертат эртен огыл. «Авам Маргарита Николаевна Токтарсола школышто тӱҥалтыш класслам туныктен, тудо мыйын икымше туныктышем лийын. Кеч-могай пайремлан эре ик-кок мурым мурыкта ыле. А вара тӱҥалтыш класслам тунем пытарымеке, мыйым Йошкар-Олаште Советский уремыште верланыше президент школ-интернатыш тунемаш пуэныт. Кӱсле дене шоктенам, туныктышем Тамара Ягельдина лийын. Тыгак школ-интернатыште йоча хорышто муренам, садлан семӱзгар дене шоктен моштымо деч посна мылам мураш моткоч келша ыле», — мане Олюк.

Умбакыже У Торъял вел ӱдыр И.Палантай лӱмеш тӱвыра ден сымыктыш колледжысе калык семӱзгар творчестве пӧлкаште  усталыкшым нӧлтен. Чонжылан кӱсле моткоч келшен, садлан туныктышо Марина Эльтемерован  вуйлатыме «Чинчывий» ансамбльыште шоктен. 

«Семӱзгар дене устан шоктен моштет, мурым  мурашат йӧратет. Кудыжо чонетлан утларак лишыл?» —  йодым Ольга деч. «Муро – хобби, чонем шулдыраҥеш, кумылем нӧлталтеш. Сценышке лектат, шонымо семын ошкыл колтет, ончаш толшо-влакын  шинчаштым ужат, шкешотан эрыкым шижам. А оркестрыште шоктымем — чон кӱштымӧ пашам. Тидлан мый тунемынам, кажне кечын паша верыш кумылын толам», — ойла домристке.

Ӱдырын колледжыште тунеммыж годым Йошкар-Олаште «Автодор» полат пелен  «У муро» студий (тудым бард-гитарист Геннадий Григорьев вуйлата) пашам ыштен. Кызыт студий Марий тӱвыра рӱдерыш куснен. Лач тунам ӱдыр тушко коштын. Геннадий Григорьевын  «Марий Эл», «Рвезылык», Александр Мамаевын «Лач тый», «А игече эре сай», «Йолташемым ом алмаште», «Изи шӱдыр», Анатолий Блиновын  «Тошкем воктен», «Торъял мландем»,   Жаудат Гильмановын «Кунам-гынат» мурыштым мура. «У муро»  студий дене пырля концертлаште усталыкшым ончыктен.

И.Палантай лӱмеш колледжым тунем лекме  деч вара О.Богачёва Озаҥ оласе тӱвыра институтышто оркестровый пӧлкаште шинчымашым налеш, калык семӱзгар дене шоктышо  специалист лиеш. «Озаҥышке 2014 ийыште  тунемаш каенам, вузышто кӱсле специальность лийын огыл, садлан домра дене шоктышылан тунемаш пуренам. Домра дене шокташ колледжыште тунемынам ыле. Тунемме жап писын эртен каен, пашам кычалаш кӱлын», — умбакыже ойла Ольга Богачёва.

«Кузе «Марий Эл» ансамбльыш логалынат?» — манын йодмемлан тыге мане: «Кумшо курсышто тунеммем годым канышлан мӧҥгӧ толынам ыле. Ик концертыште  выступатлымем годым воктекем ансамбльын оркестржым вуйлатыше Сергей Александрович Пчёлкин лишеме. Палыме лиймек, оркестрлан альт домрист кӱлмӧ нерген ойлыш, вузым тунем пытарымек,  пашаш толаш ӱжӧ. Шуко шоныде, тиде ой дене келшышым. Ты коллективыште мылам моткоч келша. Оркестр  шокталтен колта, кумдыкеш толкын семын сем йоҥгалт кая, да чон гыч памаш сем шергылт лекмыла чучеш». 

Ольга Богачёва кум йочан ешыште кушкын, шольо ден шӱжарже улыт. Тудо 24 пӧртан Кӱшыл Макмат ялжым моткоч йӧрата. «Кум ий ончыч суртлашке газпучым пуртеныт, садлан илыш куштылемын. Ялысе пошкудо-влак пашалан пижыт гын, чылан  пырля ыштат», —  манеш тудо. 

Ольга Богачёвам 14 февральыште «Кугарня» газет редакцийын эртарыме «Йӧратымашын уло юзо вий» концертыште ужын кертыда. Сылне йӱкшӧ дене кумылдам, товатат, савыра.

Татьяна Пчёлкина.