Чоя ӱдырамаш

Январьыште Йошкар-Олан дежурный частьышкыже Йошкар-Олаште илыше 47 ияш пӧръеҥ вуйшиймаш дене миен. Тудо 5 млн 200 тӱжем теҥгеаш Toyota Land Cruiser машинажым палыме ӱдырамашлан жаплан кудалышташ пуэн улмаш. Ӱдырамаш машинам пӧртылташ вашкен огыл. А вара йӧршеш йомын.

Марий Эл Республикысе МВД-н уголовный розыскшын пашаеҥже-влак машинам Ставропольский крайыште муыныт да озажлан пӧртылтеныт. Пале лийын:  ӱдырамаш машинам пӧртылташ шонен огыл, сандене тудым тора кундемыш наҥгаен да вес тыгаяк шергакан машиналан вашталтен.

Тиде факт почеш уголовный делам тарватыме. Ӱдырамаш эрык деч посна 10 ийлан кодын кертеш.