27 январьыште Йошкар-Ола воктене Семёновка селасе 21-ше номеран школышто блокадым тичмашнек кораҥдымылан 76 ий темме лӱмеш «Чоныштемже — Ленинградын ойгыжо» мероприятий эртыш.
6-шо кадет классыште тунемше ӱдыр-рвезе-влак тиде кечылан декабрь мучашыштак ямдылалташ тӱҥалыныт. Класс вуйлатыше В.А.Лысак. кажне кечын репетицийым эртарен. Тыге тыршымышт арам лийын огыл. Шинчалан эн ончыч йоча-влакын чийыме вургемышт перныш. Йоча-влак сар жапыште могай шонымаш дене иленыт? Тиде йодышлан вашмутым изирак сценкылаште модын ончыктышт. Кумдан палыме Таня Савичева денат палдарышт. Сар жапыште шочшо муро почеш сылнын кушталтышт, вальсым пӧрдыч. Шучко сарыште, неле Блокадыште ӱмыр лугыч лийше-влакым ик минут шып шоген шарналтышт. Мучашлан 8-ше классыште тунемше Аня Короткова да кок кадет класс «Дети войны» мурым йоҥгалтарышт. Ончаш толшо коча-кова, ача-ава да туныктышо-влак шинчавӱдыштым эркын ӱштыльыч. Иктаҥаш ӱдыр-рвезе-влак кидсовыш дене сценыште шогышын кумылжым вӱчкышт. Тек эре лийже тыныслык!
Шабалина Светлана, Семёновка села.
