УФСИН-ысе «Ястреб» спецподразделенийын «почмо омса» кечыж годым автомат да пистолет магазиным поген-рончышо мастер-классым ончыктышо Константин Царегородцев дене палыме лийым. Кӧлан пашам ыштымыжым да кузе тышке логалмыж нерген йодыштым.
Костя Киров кундем Яраҥ район Никулята селаште шочын. Киров олаште Вятский ялозанлык академий пелен «Защита в чрезвычайных ситуаций» специальность дене инженер-спасательлан тунем лектын. Вара армийыш каен. Тула олаште юж-десант войскаште, парашютно-десантный ротышто служитлен, взвод командирын полышкалышыже лийын.
Армий деч вара Константин ОМОН-ыш але СОБР-ыш пашаш пураш шонен.
– 2011 ийыште МВД-ште вашталтыш-влак лийыныт, сандене пашаш налын огытыл. Йошкар-Олаште наказанийым шуктымо службын управленийышкыже мийышым. «Ястреб» пӧлка нерген колынам мо?» – манын йодыч. Тиде УФСИН-ын спецназ пӧлкаже манын умылтарышт. Шуко шоныде, пашаш пураш кӧнышым. Собеседований лие. Психолог дене мутланышым да испытаний-влакым эрташ тӱҥальым.
18 подтягиваний, 70 гана кӱшкӧ тӧрштыман, 60 гана отжиманий, кок минут жапыште пресслан упражнений (100 баллан – 84 гана). Чыла нормативым шуктымеке, баллым шындат. Пашаш пурашлан 425 балл деч шукырак погаш кӱлын. Тазалык икымше группо лийшаш.
– Икымше гана экзаменым кучен кертын омыл. Уэш ямдылалташ логалын. Сдатлымеке, медкомиссийым эртенам. Кокымшо этапыште 100 метрым, 3 километрым куржман, 18 гана подтягиваний. Вара – посна комплекс: 15 отжиманий, 15 гана йолым кап деке нӧлталмаш, 15 гана пресс, 15 гана кӱшкӧ тӧрштымаш. Чыла тидым вич гана ыштыман. Изиш каналтымеке – кучедалмаш (спарринг). Кок минут дене ныл гана. Мыйын ваштареш кучедалше еҥ вашталтеш, а мый рингыште кодам. Тидымат кокымшо гана веле эртен кертынам, – ойла К.Царегородцев.
Икмыняр гана экзаменым сдатлымыжлан кӧра К.Царегородцев «Ястреб» спецподразделенийыш пурен кертын огыл. Тыге кум ий конвоир пашам шуктен. 2016 ийыште «Ястреб» службыш куснен. Ондак штурмовой пӧлкан пашаеҥже лийын, вара – инструктор, а ынде инструктор-снайперлан пашам ышта.
– Снайперын тӱҥ пашаже: тура лӱйкалаш. Но тудын моло сомылжат ятыр. Тыге вет?
– Да. Лӱйкалымаш веле огыл. Мутлан, судитлалтше еҥ вес еҥым заложникыш налын гын, ме эскерена да раций дене группылан шижтарена. Тидыже заложникыш налше еҥ группын коштмыжым ынже кол да айдемым ынже логал манын ышталтеш. А моло кечын, тыгак обыск годым спецназ пашаеҥ-влак дене пырля коштына. Мемнам ужын, колонийыште преступик-влак изиш лӱдыт, аптыранат. Пашам шочмо гыч кугарня марте ыштена. Тыгак дежурство уло, сандене каныш кечынат южгунам пашаш лекташ логалеш.
– Яра жапдам кузе эртареда?
– Спорт дене пеҥгыде кылым кучем. Каныш кече лиеш гын, сонарыш але колым кучаш коштам. Еш дене жапым эртараш тыршем.
Тыгай пашаш пураш куштылго огыл, но шонымаш уло гын, чыла сеҥаш лиеш. Костя кум ий тиде паша верым вучен. Кызыт чонлан келшыше сомылым шукта.
Фотом еш альбом гыч налме.