Чон йодмо пашашт

9 февральыште Сеҥымашын XXX-шо идалыкше лӱмеш тӱвыра полатыште республикысе мурышо да куштышо ансамбль-влакын гала-концертышт эртаралтын. Тышке кундемнан тӱрлӧ районлаже да Йошкар-Ола гыч эн уста фольклор коллектив-влак погыненыт, шке мастарлыкыштым ончыктеныт.

Тылеч ончыч мурышо да куштышо коллектив-влак Калык усталык да культурканыш паша шотышто республикысе шанче-методик рӱдерыш шке усталык пашаштым видео йӧн дене войзен колтеныт. Тергымаш деч вара гала-концертыш республикын 8 районжо гыч 350 наре тӱрлӧ ийготан участник-влак логалыныт. Кажныже могай-гынат вер дене палемдалтын.

Республикыштына тӱрлӧ калык ила, тӱрлӧ йылме дене кутыра, садлан концерт моткоч оҥайын эртыш. Рушла, марла, татарла, удмуртла мурышо да куштышо кажне коллективым калык рӱж совым кырен вашлие.

«Мемнан республикысе коллектив-влак чӱчкыдын вес кундемлаш миен коштыт, Марий Элын чапшым аралат. Чӱчкыдын «Тиде профессиональный коллектив мо?» манме йодышым колаш логалеш. А ме манына: «Профессиональный». Вара умылтарена: мурен-куштымаш – яра жапыште ышталтше сомыл. Вес кундемлаште илыше-влак тыгайлан чылт огыт ӱшане. Тыште тӱрлӧ профессиян еҥ-влак улыт. Нуно чыла тидым яра ыштат… Молан манаш гын усталык пашам оксала ышташ ок лий. Тиде – чон йодмо сомыл. Тыште чыланат шочмо йылмым уло чон дене йӧратыше, шочмо калык дене кугешныше еҥ-влак погыненыт…» – каласыш тӱвыра, печать да калык-влак кокласе кыл шотышто министрын алмаштышыже А.Н.Луничкин.

Валентина Егорова фестивальыште II степенян диплом дене палемдалтын. Гала-концертыште ӱдыр «Пӱтыральым-рончалте» калык муро дене ончышо-влакын кумылыштым савырыш. Тиде муро денак Валя Морко районышто эртаралтше конкурсышто 1-ше верым сулен, садлан тудым республикысе фестивальыш колтеныт.

Валентина Егорова Морко район Изи Корамас ялыште ила, кум шочшым ончен кушта. Тудо Кокласола тӱвыра пӧртыштӧ пашам ышта, тысе «Куан памаш» вокально-эстрадный студийыште (вуйлатыше – В.Петров) мура. Фестиваль нерген Валя тыгерак мане:

Мылам ты фестиваль – ончыко кайыме корнышто эше ик пайдале ошкыл. Лауреат лӱмым налмемлан моткоч куаненам, но пашаже дипломышто веле огыл. Мылам профессионал-влакын шонымашышт, нунын пуымо акышт шергырак. Тидыже шкемым ӧрдыж гыч ончалаш полша, ончыкыжат тыршаш кумылаҥда. Моткоч кугу таум каласем баян дене шоктышо Юлий Александрович Осиповлан. Тыгак Елена Николаевна Гурьяновалан тау. Районышто эртаралтше конкурс годым тудын поро мутшо мылам вийым пуэн, ӱшаным ешарен.