Азербайджаныште родо-тукымжо шуко

 

Республикыштына тӱрлӧ калык-влакын шочшышт илат. Нунын илыш – йӱлашт, сын-кунышт ойыртемалтше. Туге гынат тӱрлӧ национальностян еҥ-влак икте-весышт дене ваш пагален, умылен илат. Икте, вузышко тунемаш пураш манын, шочмо вершӧржым коден толын, весе Марий кундемыштак шочын-кушкын. Шомакем Йошкар-Олаште шочын-кушшо азербайджан рвезе Фарид Агамалиев нерген лиеш. Тудо МарГУ-што физический культур, спорт да туризм факультетыште 4-ше курсышто тунемеш.

Кок вершӧржӧ уло

Рвезын йоча пагытше Марий кундемыште эртен гынат, ача-аважын шочмо вершӧржӧ тудлан нимо деч шерге, лишыл кодеш. Ача-аваже Азербайджан гыч шукертак Марий Элыш илаш кусненыт. Ача-аваже Азербайджан гыч шукертак Марий Элыш илаш кусненыт. Фаридын ачажлан тунам улыжат 20 ий лийын. Ужар чодыран, сылне пӱртӱсан вер самырык вате-марийлан келшен, нуно йӧршешлан тышке кодыныт. Ешыште икшыве-влак шочыныт. Фаридын акаже Баку олаште ила. Ешаҥын, шочшан лийын.

Азербайджаныште рвезын коваже, шуко родо-тукымжо илат. Сандене кажне ийын шокшо элышке миен толеш.

«Кызыт тыште теле, а Азербайджаныште тиде кечылаште гына лум возын. Тушто шокшо игече. Арам огыл Азербайджаным «Страна огней» манын ойлат. Баку олаште мылам «Девичья башня» келша. Тудо ик эн кугу башньылан шотлалтеш», – ойла Фарид.

Азербайджан тӱвыра рӱдерын еҥже

Ачаже Иса Будаг-Оглы Агамалиев ондак Йошкар-Оласе ик заводышто пашам ыштен. Ынде ятыр ий республикыште Азербайджан тӱвыра рӱдерым вуйлата. Фарид эргыжат рӱдерышке кумылын коштеш. Рӱдерын пашаеҥже-влак Йошкар-Олаште, тыгак республикысе тӱрлӧ верлаште мероприятий-влакым эртарат. Азербайджан йӱлам, куштымашым ончыктат. Фарид тӱрлӧ мероприятийлаште азербайджанла кушта, тале куштызо. Тудо Йошкар-Оласе 14-ше №-ан гимназийыште тунемын. Школышто хореографический кружокышко коштын. Марла кушташат тунемын шуын. Кружокышто налме шинчымаш тудлан варажат кӱлеш лийын.

Ты рӱдер поро пашам шукта. Тидын нерген студент Фарид Агамалиев шуко каласкалыш.

«Ме, Марий Элыште илыше азербайджан-влак, активный илыш йӱлам кучымынам, икте-весе дене ваш келшен илымынам ончыктена. Ме шке  кундемыштына огына иле гынат, йӱланам да веранам огына мондо. Марий-влак мыланна полшен шогат. Нунылан поснак таум ойлымо шуэш.

Рӱдерышке 50-60 еҥ наре коштеш. Кажне арнян погынена. Пайрем-влакым эртарыме годым ме руш, марий, татар-влакым ӱжына. Йошкар-Оласе Пеледыш пайремыште участвоватлена. Парадыште ошкылына. Савино йоча школ-интернатлан полшена. Нунылан оксам, кӱлеш вургемым колтена. Ачамын тыршымыж дене Шернур тракт корнымбалне «Дружба народов» памашым ачалыме».

Бокс, дзюдо дене заниматлен

Фарид йоча жапше годсек спортлан шӱман. Гимназийыште тунемме годымак бокс, дзюдо дене заниматлен, футболла модын. Ончыкылык профессийым спорт дене кылдаш шонен. Гимназийым тунемын пытарымеке, шуко шоныде, МарГУ-н физический культур, спорт да туризм факультетышкыже тунемаш пурен. Спорт мероприятийлаште участвоватлен. Факультетысе баскетбол командыште модын. Ик гана веле огыл «Студенческая весна» фестивальыште мастарлыкшым ончыктен. Тиддеч посна волонтёр пашам шуктен.

 

Национальный пайремым палемдат

Азербайджан-влак ислам верам кучат. Нуно мечетьышке коштыт, еш кокласе национальный пайремым эртарат, азербайджан йӱла дене кылдалтше кочкышым ямдылат. Фаридат кажне кугарнян йолташыже-влак дене пырля мечетьышке кумалаш коштеш.

Нунын ик эн кугу пайремлан Новруз, Курбан байрам шотлалтыт.

«Нине пайрем-влакым шошым эртарена. Курбан байрам вашеш ме икте-весе деч нелеш налаш огыл йодына. Пӧрткӧргына ару, чонна яндар лийшаш. Сандене пайрем деч ончыч чыла эрыктена. Курбан пайрем годым Юмылан тагам надырлан пуэна. Тиде йӱлам Азербайджан тӱвыра рӱдерын еҥже-влакат шуктат. Тыгодым шорык шылым начарын илыше еш-влаклан пуэна. Пайрем 2-3 кече шуйна.

Долма, пахлава, хашлама кочкышым ямдылена. Долма кочкышым виноград лышташ дене ыштат. Шорык але ушкал шылым шолтена. Тыгыдемдыме шылым виноград лышташышке пӱтырена. Кочкышым ӱмбал дене кочман. Пахлава тамле кочкышым грецкий пӱкш да  фундук дене ямдылена. Хашлама манме шӱрым шолтена», – ойла рвезе.

21 ияш студент жапым яра огеш эртаре. Тунемашат коштеш, мероприятийлаштат участвоватла, тыгак пашам ышта. Ынде вич ий амалкалче сомылым шукта. Йошкар-Олаште автомойкым почын.

Фарид Агамалиев шочмо йылмыжым йӧрата, азербайджан йӱлам акла.