– Шке гармоньем лийын огыл. Шокташыжат клубысо «Шуйская» гармонь дене тунемынам. Изи годсекак шке гармонь лийже шонем. Чаманен каласыман, алят тиде шонымаш шукталтын огыл. Но армийыш миен толмекем, наламак! — каласыш Шернур район Лажъял ялыште шочын-кушшо, кызыт Параньга район Кугу Пумарий ялыште илыше Игорь Горинов.
Тудо Лажъял школышто тӱҥвлтыш класслаште тунеммыж годым математикым чот йӧратен. Спорт ден музык йӧршынат кумылаҥден огытыл. Кугу Пумарий школыш тунемаш куснымеке, спорт дене заниматлаш тӱҥалын. «Йывырте» ансамбльыш ӱжыныт.
«Ансамбльым Светлана Хаметова вуйлата, а гармонист тудо жапыште Михаил Веселов лийын. Ансамбльыште гармонь семым колыштын, мурен-куштен. Шкемынат шокташ тунемаш кумылем лектын Кандашымше классыште тиде семӱзгар дене шокташ тунемаш тӱналынам. Ондак мӧҥгыштӧ шке семын паҥга-влакым темдыштын шинчылтынам, а вара тунеммем ужын, авам туныкташ пижын. Тудо И.С.Ключников-Палантай лӱмеш тӱвыра да сымыктыш колледжым тунемын пытарен», — ойла Игорь.
Гармонь дене шоктен-мураш кумылжо эреак лийын, сандене рвезе гармонь дене шокташ тунемаш тыршен.
Игорь кызытат «Йывырте» ансамбльтын участникше, тыгак МарГУ-со «Марий мурсем» ансамбльыш коштын.
Кызыт Игорь шкаланже у илыш омсам почеш, армийыш каен. Тек салтак корныжо куштылго лиеш.