Йӱклымаш лиеш

Эрла Россий Конституцийыш вашталтышм пуртымо шотышто йӱклымаш лиеш. Тенийсе чер шарлен кертме лӱдыкшӧ улмо пагытым шотыш налын, йӱклымашым элна мучко ик кечыште огыл, а арня мучко эртараш палемдыме.

Республикысе Рӱдӧ избирательный комиссийын палдарымыж почеш, ончылгоч йӱклымӧ 5 кече коклаште

Марий Элыште 215743 еҥ (чумыр илыше деч — 40,3%) сайлымаш участкыш миен. Утларакше Шернур 69,14 (%), Юрино 62,97 (%) да Килемар 62,62(%) районышто йӱкленыт. Йошкар-Олаште — 26,3%.

Ушештарена: йӱклымаш сайлымаш участкылаште гына огыл, посна пунктлаштат эрта. Участковый комиссийын еҥже-влак йодмо почеш илыме верышкат мият. Тиде йӧн дене утларакше яллаште пайдаланымым Интернетысе социальный сеть-влак пеҥгыдемдат. Фото-влакым лач тушеч налме.

Ончылгоч йӱклымашке Марий Элым вуйлатыше А.Евстифеев миен, республикыште илыше-влакымат тыгак ышташ ӱжын.

— Йӱклымаш — торжественный кече гына огыл, мемнан ончыкылык пӱрымашнам рашемдыме жап. Тӱҥ закон илышлан юридически келыштаралт пеҥгыдемдалтеш. Шуко нормыжым отраслевой гыч Конституций кӱкшытыш нӧлталме. Паша шотышто права дене кылдалтше, социальный статус дене йодыш-влакым да молымат, — каласен А.Евстифеев.

РФ Конституцийыш вашталтышым пуртымо шотышто республикысе Кугыжаныш Погын председательын алмаштышыже, МарНИИЯЛИ вуйлатыше Е.Кузьмин:

— Россий Конституцийыш вашталтышым пуртымаш — историйыште посна палемдалт кодшо йыжыҥ. Кеч-могай элын Конституцийже — «илыше» документ. Тудо уло гын веле кугыжаныш ила, вияҥеш. Уке гын, историеш кодын, Конституций законодательный памятник семын гына аралалт кодеш. Санденак мый кугыжанышнат лийже, вияҥже, чылажат тӱҥ закон дене тӧр, Конституцийын йодмыж почеш шукталтше манын йӱкленам.
Пытартыш жапыште Россий вашталтын, калыкат вестӱрлырак лийын. Тугеже эше 1993 ийыштак илышыш пурталтше Конституцият вашталтшаш. Тушко пуртымо темлымаш-влак кугыжанышын негызшым утларак пеҥгыдемдаш да тӱнямбал кӱкшытыштӧ утларак вияным ышташ полшышаш улыт.

Анастасия Березина, тӱнямбал спорт мероприятий-влак шотышто менеджер:

— Тачысе илышыште Ме илена! Сандене Конституций верч йӱклыде кодшаш огынал. Тудо элын вияҥмаштыже кугун полшен кертеш. Кузе йӱклышашым кажныже шке ойыра. Но мый утларак кӧргӧ йӱкым колыштын тидым ышташ йодам. Ваштареш ышташ тӧчышӧ-влак могай гына роликым огыт шаркале, блогер-влак калыкым алгаштараш мом гына шонен огыт лук. Сандене чын ошкылым шкевуя шонен ыштыза. Йодыш лектеш гын, чынжым пален налза, рашемдыза да чын йӱклыза!

Фотом Интернетысе соцсетьла гыч налме