Йодышлан уло вашмут

Пагалыме лудшына-влак, черке дене кылдалтше йодышда-влак улыт гын, мыланна возен колтыза але йыҥгыртыза. Вашмутым пырля кычалына.

Черкыш пураш ямдылалтын омыл, но пурынем

– Урем дене ошкылшыжла, самырык еҥ черкыш пурынеже. Тыгодым тудо, мутлан, чурийжым чот чиялтен але ӱдыръеҥ йолашым чиен. Тыгай годым черкыште шєрын ончымымат але вурсен каласен ойлымымат палем.

Н.Михайлова.

Морко район.

 Морко посёлкысо Юмо Кончымо лӱмеш храмын настоятельжылан священник Леонтий Очетов вашешта:

– Черке пашаеҥ-влаклан кугу чытыш кӱлеш. Тӱжвал сыным ончыман огыл. Тыгай чиеман еҥ толын гын, тугеже храмыш тудым Юмо, суксыжо конденыт. Кеч-кунамат порылыкым ончыктыман. Ик гана айдеме черкыш толеш да порылыкым шижеш гын, вес ганат тышке толаш кумылжо лектеш. Конешне, ӱдыр-влак храмыш кужу юбкым чиен, шовычым пидын толшаш улыт. Шуко гана тыгай сӱретым ужынам: илалшырак кова-влак самырык ен-влакым, йӱкым кугемден, черкыштак туныктен ойлат. Ласкан умылтарыман, кумылыштым волташ ок кўл. Илалше-влаклан чыташ тунемман, а самырык-шамычлан – мутым колышташ. Черкын омсаже чылалан почмо.

 

Сортам чӱктынем

Храмыш икымше гана толшо еҥлан эн ончыч могай юмоҥа ончылно сортам чӱктыман?

Анастасия.

Звенигово район.

 Морко храмын настоятельже протоиерей Леонтий Очетов вашешта:

– Сортам налын, черке покшелне вераҥдыме юмоҥа воктек  толын,  ме  Юмылан  шке пӧртышкыжӧ кондымылан, илышым пєлеклымылан тауштен кумалына. Юмо деч шкенам проститлаш, мыланна полшаш, корнынам волгалтараш йодына. Черкыш толын, моло еҥым ончен, тунемаш лиеш.

 

Еш, йоча-влак да Юмо…

Йочам кузе черке деке туныкташ? Молан тиде кӱлеш?

Алёна.

Морко район.

У Торъял район Элембай селасе храмын настоятельже Сергмй Бажанов вашешта:

– Ме йоча-влакым тынеш пуртена, йӧратен ушнышо да ешым чонышо-влакым венчатлена. Калык дене мутланена, веран негызше-влак нерген умылтараш тыршена. Вет южо еҥ раш огеш умыло: мо тыгай еш, мо тыгай йºратымаш? Изи нелылык лиешат, ойырлат, еш шалана. Йочам, тынеш пурымеке, черкыш коштыкташ тыршыман. Айдеме изинекак ты шӱлышым шижын, черкыште мо ышталтмым ужын, Юмын храмым пален кушшаш. Эше ондак ида ман. Йоча-влак чыла умылат. 13-14 ияш подростко-влаклан те нимом умылтарен огыда сеҥе. Шочшыда уремыште, телевизорышто, тӱрлӧ гаджетыште шучко илыш сӱрет-влакым, осал койышым, торжалыкым ужеш. Тыгай годым «эше ондак» манын, нигӧ ок ойло. Осалжым чыланат изинек палат, а святой да поро шӱлышым – уке!

 

—  Изирак ӱдырем, тудлан 14 ий темын огыл, акамын ӱдыржын кресаваже лийнеже. Тыге ышташ шотлан толеш мо?

— Ӱдыр кресава лийын кертеш. Но тиште весым шотыш налман. Ӱдыр Юмылан ӱшанымыжым умыла мо? Ончыкшым тукым шӱжаржым воспитыватлаш ямде мо? Ты йодышым храмышет бачышка деен кутурымо годым решатлаш лиеш.

 

*  *  *
—  Мыланем ик еҥ деч шергаш кодын. Но тудо еҥ чот черле лийын, чот орланен. Колынам, тыгай шергашым чийыман огыл. Тудым черкыште освятитлаш лиеш мо?

— Да, лиеш.

 

*  *  *

— Куд ияш эргымым храмым коштыкташ тӧченам. Но службышто шогаш чытышыже огеш сите. Чылажат оҥайла чучеш, садлан эре тӱрлым йодыштеш. Южгунамже вашмутым ом пале. Ача-ава-влаклан йоча-шамыч дене пырля бачышкам колышташ иктаж-кушко мияш лиеш мо?

— Рушарня школыш кошташ темлен кертына. Тыгайже чыла гаяк храм пелен уло.

 

*  *  *

— Соборований деч вара душыш, мончаш пураш, икманаш, сулыкан капым эрыкташ, лиеш мо?

— Лиеш. Кокытеланымаш ынже лек манын, соборований деч вара ӱйым капда мучко сайын йыгыза, коваштыш сайын шыҥыже. Да мушкылташ лиеш. Благодатьым вӱд дене мушкын колташ ок лий.