1 июньышто Татарстан кундем Муслюм район Марий Пӧлер селаште Пеледыш Семык пайрем эртаралтын.
Ты кечын икмыняр площадке пашам ыштен. Ик вере марий тӱрым тӱрлымӧ шотышто дене мастер-класс лийын гын, весышт уа дене пидаш тунемыныт, кумшо вере шун дене тӱрлӧ ӱзгарым ыштен ончаш темленыт. А эн тутло мастер-класс – команмелнам ыштымаш. Ты пайремыш толшо кажне уна ты кочкышым шке кӱэштын да тамлен кертын.
Йоча-влакланат модын куржталашышт верым ойыреныт. Тыгак ял шотан илем-влак шке мастарлыкыштым выставке дене почын пуэныт. Мутлан, тӱрлӧ марий вургемым, пу дене ыштыме ӱзгарым ончыктеныт, мӱй, мелна дене сийленыт. Пайрем годым «Чевер марий ӱдыр» да «Марий патыр» конкурс-влак лийыныт. «Чевер марий ӱдыр» конкурсышто Татарстан кундем Кукмара район Курыкӱмбал ял гыч Ангелина Ирбулдина, а «Марий патыр» конкурсышто Челна ола гыч Алексей Субаев сеҥеныт.
– Кукмара район «Кна вел» ансамбль дене ятыр гана Семык пайремыш выступатлаш коштынна. Тунам шкеат ӱдыр-влакын таҥасымашыштым онченам. Ты гана ансамбльым вуйлатышына Леонид Александрович Искаков конкурсыш йодмашым возаш таратен.
Тений моло ийла дене таҥастарымаште мотор ӱдыр-влак эн шукын лийыныт – 10 еҥ. Конкурс икмыняр ужаш гыч шоген: дефиле, визитный картычке, пайрем сий, ожнысо арверын мом ончыктымыжым каласаш да творческий номер. Мыланем ожнысо арверым пален каласаш изиш нелырак лийын. Но шкемым пеҥгыдын кученам, очыни, садланак икымше верыш лектынам, чот куаненам! – ойла Ангелина.