Кузе илет, студент?

Илыш ончыко кайымылан кӧра студент-влакынат илышышт весемын. Стипендийымат тӱлат,  илыш условият саемын. Студент-влаклан  тунемашышт  чыла йӧн ышталтеш. Тиде тыгак мо?

Ольга Кошкина, Советский район Кукмарий ял:

—  Мый Йошкар-Оласе  медколледжыште «Сестринское дело» специальность дене тунемам. Тыгай профессий кӱлешан, шонем. Черле еҥланат полышым пуымем шуэш, сандене тыште тунемаш шоненам. Чылаже 125 еҥым налыныт, списке почеш мый 13-шо лийынам.

Тӱшкагудышто ом иле, молан манаш гын тудо ола тӱрыштӧ верланен. Тушеч толаш пеш шуко жап кӱлеш. Тыгак тудо микрорайонышто кошташ лӱдыкшӧ манын колынам. Тылеч посна тӱшкагудышто верым 1-ше курсышто веле пуат, а вара илыме верым садак кычалман. Уто паша ынже лий манын,  пачерым айлен илем.

Валентина Алексеева, Морко район Семисола ял:

 

— Студент жапыште чыла вере шуаш, шкет тӱрлӧ вере тергаш тыршена. Но южгунам ты корнышто тӱрлӧ чарак вашлиялтеш. Кызыт тунемаш шуко йӧн уло, шке уш-акылетым пойдаре веле. А кунам илыме верым пуат, эшеат пиалан улат.

Мыят  МарГУ-што магистр степень дене умбакыже шинчымашым погаш шонен, тунемаш пурышым. Чыла сай, но тӱшкагудо укелан кӧра икмыняр кечым палыме-влак дене илаш логале. Тыгак ялыш чӱчкыдын кудалыштым. Тылзе утла  тӱшкагудышто верым «кӱтен» коштмек, куштылгын шӱлалтышым, илаш верым пуышт.

Тачысе кечылан ик стипендий дене гына илен лекташ ок лий, сандене кажне  студент, магистрант-влак, пашам ыштат. Мылам  «Артек» йоча рӱдерыш кум тылзылан миен толаш йӧн лекте. Крымыште пӱртӱс мемнан деч чот ойыртемалтеш: шокшо, ласка, Шем теҥыз, кугу курык-влак –  чылажат мондалтдыме! «Артекыште» воспитательлан пашам ыштенам. Тӱрлӧ ийготан йоча-влак дене иктӧр лияш логалын. Канаш толшо йоча-влак дене жапым эртарен, шкежат шуко уым да оҥайым пален налынам. Лагерьыште тӱрлӧ ситуаций лиеден, сандене ача-авамат алмашташ логалын. Икманаш, жапым пеш пайдалын эртаренам.

А кызыт уэш шочмо кундемыште улам, умбакыже шинчымашым погем.

 Екатерина Яналова, Шернур район  Чылдемыр ял:

Торгово-технологический колледжыште продавец-контролёрлан, кассирлан  кокымшо курсышто тунемам. Чылаже кум ий тунемман. Тиде профессий мыланем изи годсек келшен. Тунемам яра. Стипендийым 600 теҥгем тӱлат. Жапын-жапын практикым  колледжысе буфетыште эртена. Мутлан,  тылзе тунемына, тылзе пашам ыштена. Тыге ме теорийым веле огыл, ыштышаш сомылымат пален налына.

 Стипендий

400-700 теҥге –  колледж ден училищылаште;

2000-3000 теҥге – вузлаште.